الحمد لله

أكتوبر 27, 2007 by أنمار Anmar

 

بسم الله الرحمن الرحيم

إقرأو الموضوع للآخر!

 

 

Baitalmal

. بيت المال

 

 

خبر سار اليوم

تم بحمد الله الإنتقال بالمدونة إلى سيرفر بيت المال

anmar.baitalmal.com

الخادم العزيز على قلوبنا إحنا البيت الماليّين

الله يحييكم في البيت الجديد مع الحلة الجديدة

المدونة تتمتع بميزات جديدة و حلوة حتعجبكم!

 

 

المطلوب

قبل ما تدخلو على المدونة, أعملو المطلوب إللي في الصورة الكبيرة إللّي تحت عشان تشوفو المدونة بأفضل شكل ممكن

بالعربي, لحد يدخل بإكسبلورر

أولاً الإكسبلورر مريض و حيحتاج يقعد في المستشفى لمدة طويلة إلين ما يتعافى ( فحياخد وقت ) أو إنّو يمرض مرّة و يموت (( يا رب ))

هوّا دا المفروض

ثانيًا كل شي ملخبط في المدونة على الإكسبلورر فحتتعبو و تطفشوا

 

أستخدمو فايرفوكس إن كنتو على أي صنف كمبيوتر

و إن كنتو على الماك إدخلو بسفاري 3 لأن أنظف نتيجة طلعت عليه و حتعجبكم المدونة عليه أكتر

و الإنسيابية فيه جدًا نضيفة و ما تعبني بتاتًا في حكاية التصميم

الله يخليك لينا يا ماك

 

 

رسالتي لكل المتابعين

أتمنى إنكم تستمتعو بالمدونة الجديدة و إن شاء الله ما تواجهو أي صعوبات في فهم كلامي إللي صعب متابعتو بسلاسة

المستقبل دايمًا أحلى

و مواضيعي بإذن الله تكون ألز!

مدونة أنمار على وورد بريس كانت من أكبر التجارب إللي عدّت عليّا تغييرًا في النفس

من مواضيع لردود و مناقشات و تفاعلات و إهتمامات, الكثير منها كان من الممتع

يا رب تكونو أخدتو نفس الإنطباع أو ما يشابهه عن مدونتي هذه و إن شاء الله تتابعو زي دايمًا في المدونة الجديدة ” . بيت المال “

المواضيع السابقة لم يحدد مصيرها

موجودة و لكن في يوم ممكن تتنقل أو تمسح!

القرار لم يتخذ بعد

Don’t bother and stick with the new stuff

أشكر كل من ساعدني على تحسين أمر المدونة من تصحيح و نصح في حكاية الرسومات و الصور المدرجة في المحتوى

شكر خاص محمد ملياني

و ذلك لتذكيري بالتحويل لخادم بيت المال

حيث أنّي الآن معروف بين أخواني و أختي على الخادم أكتر من أول

غير كدا لقبي بيت المال, ولاّ ناسيين؟

:D

 

 

زواري الجدد

مرحبًا بكم و أتمنالكم وقت ممتع و شيق في المدونة الجديدة لتحوز على إعجابكم و تنال زياراتكم الدائمة لها

المفروض ما تطولو في هذه المدونة, روحو للجديدة!

أضغطوا على كلمة . بيت المال تحت الصورة الزرقاء إللّي فوق

 

 

و السلام عليكم و رحمة الله و بركاته :)

 

 

 

Kill IE

 

هل تستطيعون تخيل أن هذا الموضوع ليس بالمشروع الموعود به في المواضيع السابقة؟

في أمان الله

غدًا

أكتوبر 26, 2007 by أنمار Anmar

 

بكرة الصبح

:D

 

 

 

باك تو سكوووووول

سبتمبر 24, 2007 by أنمار Anmar

باص المدرسة

دراستي بدأت من جديد و كل شي زي اللوز و الحمد لله
على رمضان في تعب شوية بس الوضع مستتب
الكلاسات الجديدة مرة حلوة و أوقاتها ما تتعب
غيرت الهيدر ( بالنسبالكم تغيير كبير )!!
اللون الأسود بعّدتو دي الفترة ( يمكن, يمكن عشان رمضان )
:D
أروح الجامعة يومين بس ( و اليومين دي مليانة كلاسات )
و إحتمال تجيني وظيفة برّة الجامعة إن شاء الله
أدعولي
و رمضان مبارك

سلام

أسفي على تأخير المشروع

سبتمبر 17, 2007 by أنمار Anmar

 

 

كمان شوية

 

 

 

ما شاء الله المدونات منورة في كل محل
الله يسعدك يا رمضان فرحتنا بجيتك!

لو تلاحظوا المدونة حصلّها تغيير بسيط في المحتويات الجانبية
و ذلك بتغيير مكانها إلى اليسار
و تغيير بعض الخطوط العربية
الأمر دا حصل من قبل المستضيف و ليس منّي أنا
هادا شي

 

 

فكرة تغيير الثيم بدأت تسير جدية شوية و أكيد حأدّيها تفكير أكبر إن شاء الله في المستقبل القريب
مو دحين لأني مرة طفشان من حكاية الثيمات الجاهزة و أبغا أبني الثيم الخاص بيّا أنا من الألف إلى الياء
حأبدأ من الصفر يعني إن شاء الله
عشان النتايج تطلع زي ما أبغاها إن شاء الله
( و بإختصار دا مشروع تاني )

 

 

و على فكرة
أنا عارف إنّو المشروع الأولاني مرة طفشكم و أنا أقلكم خلاص باقي شوية باقي شوية
أخرتكم كتير أنا عارف و أعتذرلكم
سببين عطلوني
الأول إنّي أنشغلت شوية
التاني إنّي بأواجه عقبات في المشروع و مو راضي يتلحلح ( مصنقر معايا )
الله يهديه بس

المهم
أعطيلو كمان شدتين كدا و أرجعلكم إن شاء الله
في غيابي, لا تنسوا تستمتعوا برمضان, شهر الخيرات

 

( سؤال جنّابي: أحد عندو تعليق على الصورة؟ )

 

و السلام

 

الجمعة في رمضان

سبتمبر 15, 2007 by أنمار Anmar

 

 

ز�مة الجمعة

 

 

 

الحمد لله اليوم صليت أول جمعة في شهر رمضان
الصراحة الخطبة كانت مرة حلوة و ظريفة
كانت عن الجَلَد ( بفتح الجيم و اللام )
و الطمع
و خاصةً في حكاية الصيام
باختصار
إنو كيف البني آدم ما يهلك نفسو و ما ياكل حاجة غير تمرتين و كاسة لبن و عليها إلين تاني يوم
يعني ما يصعب الأمور على نفسو قد كدا
و إنو الواحد ما يطمع في الأكل الكتير و غيرو ما عندو أكل يفطر
و في شغلة ذكرها الشيخ برّا الموضوع عجبتني
يقلك البني آدم إللي حاسس بإنو الناس مهي معبرتو و ماهي مديتلو أي إهتمام, إحتمال كبير يكون السبب إنّو أعطى الدنيا أكتر من قدرها و سيّب الآخرة من غير إهتمام
و إللي عجبني أكتر
عبارة قالها بعد الموضوع ( أولائك ناس بنو دنياهم و دمرو آخراهم )
ما أظنها حديث أو آية
أتوقع مجرد مقولة
و لكنها فعلاً مهمة
إنك تعطي دنيتك أكتر من آخرتك
و الله المستعان

 

 

غير كدا بصراحة ( مع إني أنبسطت من الخطبة و الصلاة )
قبل ما أدخل المسجد, لاحظت حاجة مرة زعلتني
و خاصةً على دخول رمضان
شي أول مرة يحصل في حياتي
متعود يدخل علينا رمضان و المساجد تتملى و السيارات زحمة برة عند المسجد ( دا الكلام في السعودية )
المرة دي و أنا في أمريكا, ما حتصدقوا إنو الناس في جمعة رمضان سارو أقل من الأيام العايدية!!!!!!!!!!!
أنا ما صدقت
و زعلت مرة
صحيح الواحد يهمو أمر الإسلام حول العالم
بس فين الصلاة في السعودية, و فين الصلاة في المساجد هنا في أمريكا
حاجتين مختلفتين مرة
أنا أتوقعت الإسلام بيزيد بشكل ملاحظ برة ( و هوّا فعلاً ملاحظ, ما أخفي عنكم يعني )
و لكن اليوم لاحظت قلة إيمان في قلوب الناس إللي بيجو صلوات الجمعة في شهر رمضان
يعني إن شاء الله ما أكون ظلمت أحد, و لكن حاجة مرة ما أتوقعتها من المسلمين في دي الأيام
على رمضان الواحد يفتكر أهمية الصلاة و يتذكر أجرها و ثوابها عشان لمن يعدي رمضان تبقى معاه إلين ما يجي رمضان السنة الجية
و بعدها كمان يزيد من التذكير
ما أقدر أقول غير الله يهدي عباده
و الموضوع لازم أذكر بيه الخطيب

 

 

أعطوني آرائكم

 

رمضان مبارك

سبتمبر 14, 2007 by أنمار Anmar

 

 

رمضان مبارك

 

 

 

السلام عليكم و رحمة الله وبركاته

كل عام و أمة محمد عليه أفضل الصلاة و التسليم بخير و نعمة

أعاد الله علينا و عليكم رمضان المبارك بكل الخيرات و الطيبات

فاللهم بلغنا نهايته كما بلغتنا بدايته

 

 

حبايبي

كيف أحوالكم؟!!

وحشتوني

و إن شاء الله أكون واحشكم

اليوم أول يوم رمضان ( بالنسبالي هنا في أمريكا )

فحبيت أباركلم على شهر القرآن الكريم

و شهر الصيام

و حبيت أسويلكم خلفية لزيزة كدا

و أتمنى إنها تحوز على إعجابكم

و تدخل الفرحة على قلوبكم على دخول الشهر الكريم

 

 

أما عن الموضوع إللي فات!!

موضوع المشروع

فأنا ما زلت شغال عليه

و اتضح إنّو الموضوع يحتاج شغل زيادة كمان

و لكن أكيد محا أسيبكم زي ما إنتو كدا

و سامحوني إزا طولت عليكم

بس الإنشغالات حاجة ضرورية في حياة الشخص الناجح

و أنا معاكم على طول إن شاء العلي القدير

و كل ما جاتني فرصة أسلم عليكم حأسلم عليكم!

 

 

أتمنّالكم صيام و صلاة مباركين

و أشوفكم قريب إن شاء الله

عالعيد إن أمكن

السلام عليكم

 

جي جي في الطريق

سبتمبر 4, 2007 by أنمار Anmar

 

 

راجع

 

 

 

السلام عليكم
هاااااااااااااااااي

كيف حال الجميع
أكيد متحمسين على المشروع و إيش حيكون!
صح؟!
هههههههه

خلاص هانت هانت
إن شاء الله قريب
شغال عليه و مرة ماشي زي الحلاوة و الحمد لله
بس حبيت أبشركم عشان لا تنسوني

عندي كم سؤال عالجنابي
إيش متوقعين مشروعي يكون؟
و كم متوقعين مقدار النجاح للمشروع بما إنّي أنا أنمار إللي شغال عليه؟
بناءًا على ما تعرفونه عن أنمار ( من المدونة و الشخصية إللي بتكتب فيها )
إجاباتكم حتفيدني كتير
أشكركم حبايبي


و على فكرة
حأجهزلكم خلفيات ظريفة بعد فترة
( و لا مو هوّا دا المشروع )
:)

السلام عليكم

حاجـتـيــن إتـنـيــن

سبتمبر 1, 2007 by أنمار Anmar

مفاجأة

 

 

سلامو عليكم

 

اليوم أنا مرّة مبسوط و حاسس بالحماس طالع من رجلي
فخرجت من البيت و أدّيتها جري إلين ما ضاع النفس
و أختفى
صبرت شويتين كدا و رجع مرة تانية
فأديتها جري كمان
زدت الطينة بلة و جريت في طلعات!
خبصتها كمان و أديتها نزلات!!
كملت يمكن ساعة بكاملها من الجري العشوائي
إللي مو داري فين مصيرو
الحمد لله رجعت البيت و أخدتلّي دش لزييييييييييييز
طبعًا عضلات الضهر شوية فكفكت معايا و حسيت بشد, و ألم خفيف في الكعبين
أكيد وضع طبيعي لأني ما حرقت المناطق دي بدي الشدة من أوّل
إن شاء الله أستمر على كدا أقل شي مرّتين في الأسبوع
منّو أخفف وزني و منّو حماس أكتر و أكتر!

 


عندي خبر و بشرى اليوم

 

حأبدأ بالبشرى
عدد الزوار للمدونة أزداد الحمد لله
و جاني إيميل قبل كم يوم من زواري الأعزاء ( إللي ما يردّو على المواضيع )
محا أقول إسمو عشان الخصوصية
الإيميل فرحني مرة و خلاني أتفائل بنفسي أكتر و أكتر
بكل إختصار
الإيميل كان نصيحة ليّا كصاحب هادي المدونة ( المختلفة ) بإنَي أطنش كل الناس إللي مو عاجبهم الوضع أو المواضيع فيقعدو يحشو و يسبو فيّا ككاتب أو مدون
الإيميل كان نتيجة لكتابتي موضوع الإنتقادات إللي فات قبل فترة
غير دي النصيحة
مرسل الرسالة وضح بشكل كبير جدًا إعجابو بالمدونة و حبو لمواضيعي و متابعتها كل يوم و إنتظار المزيد منّها أول بأول!
حاجة تفرح و الحمد لله

 


أمّا عن الخبر

 

فأنا دخلت في حاجة دي اليومين جديدة عليّا
ما عندي خلفية كافية عنّها
فبأبحث و أستزيد فيها إلين ما أوصل لأهدافي إللي أرغبها منّها
قبل فترة جاني حلم غريب جدًا لقيت فيه الفكرة!
و بديت مع الأيام أفكر و أفكر
إلين ما قررت أشتغل على الموضوع
فقبل أمس بدأت ببناء مشروع معين ( صغير )
كبداية, جدًا ماني شايف إنّو الموضوع سهل
و لكن!
مع الوقت أكتشفت إنّو عشنّي ماشي صح و بأتبع خطوات مرتبة
الوضع ماشي زي اللوز و الحمد لله!

 

حتكون أخبار المشروع مفاجئة
و بإذن الله حأعلن عنّها وقت ما تنتهي هنا في المدونة!
أتمنّى الفكرة تخش أدمغتكم بكل سلاسة و حنية
عشان تفهموها و تحسو بحلاوتها
أدعولي بالنجاح!
و شكرًا على قرائتكم للموضوع

 

السلام عليكم

 

نعسان

اغسطس 31, 2007 by أنمار Anmar

 

بيبي

 

 

لمن الواحد يخرب نومو بأي سبب من الأسباب ( و الأسباب مرة مرة كتير )
كيف يعدل النوم؟
صح يستخدم قهوة؟
عشان يقعد صاحي إلين يجي وقت النوم
ولاّ ينام زيادة إلين ما يجي وقت الصحيان؟ ( بالقوة و الغصب يعني )

 

عانيت كتير مع النوم
لأنو مرة خربان معايا دي اليومين
نفسي أصلحو
قاعد أحاول مع القهوة كتير
بس خايف من مشاكل النوم إللي تجي للواحد على الأربعين, خمسين سنة ( من القهوة و كترتها )
فمحتار

 

هدفي
أصحا لصلاة الصبح على الوقت
و أنام بعد صلاة العشا على طول
يمكن أتفرج على فلم واحد ( بالكتير مرة )
يعني إزا ما كان فلم, ساعة ساعتين تلفزيون
و بعدها نووووووووووووووووم إلين الفجر
و إنتا ماشي

 

الهوا في الصباح مافي أحلا منّو
و النوم بعد العشا ( صلاة العشا ) مافي ألز منّو

 

في أحد بيعاني من مشاكل نومة العصر؟
الناس إللي بيدرسو أو يشتغلو أظن يحتاجو شوية نوم على خفيف
أهم شي نخليها على ساعة بالكتير, و لا تزيد عشان النوم لا يخرب و يسير زي نومي
أنصحوني يا حبايبي أدعيلكم إن شاء الله

 

أحلام سعيدة

التـلسيع الصدّاح

اغسطس 30, 2007 by أنمار Anmar

 

 

دمعة

 

 

 

لمن الواحد يغني بصوت عالي ( مو متقطع )
عذب, نقي, عميق و ممتلئ بالنغم
العيون تكون مغمضة
و في كتير حالات تدمع

و الـ
Harmony
إللي ما أعرف إسمها بالعربي
تناسب الإيقاعات
أو تناسبها مع الألحان أو اللحن
أقرب مثال
لمن إتنين يغنو شي واحد
كل واحد لو صوتو المختلف
لاكن إجتماعهم مع بعض ينتج صوت تالت مختلف
ما يسمّى بالهارموني
و ليس بالـ ( هرمون )
حق النمو

و لمن الصوت يستمر و يسترسل مع التكرار أو التعداد
و في نص الطريق المغني يضحك على إنسجامو
إلين ما يجي السكون على النهاية
و الدقات الخفيفة على الآلة الموسيقية
و الشكشكات اللزيزة من الإيقاع
و تبدأ القشعرة الخفيفة بشويــــــــش
برواقة كدا بدون مضاربة و زن و نكد
و لا حتى تنقيز
تنتهي الأغنية و الوجوه كلها تعتدل على عظمة إللي فات و عدّى

الله عالطرب
الموسيقى كبيرة و أعتبرها شبيهة بالسكار
و إن كان التشبيه مضحك
بس كل مافي الموضوع إنو الموسيقى تشيلك من مكان لمكان تاني
عالي
بعيـــــــــــــــــــد
و لو طعم مختلف

جميل … و حلو
يعني لزيز

في أحد يفكر بدا الأسلوب؟
أعرف أغلب العالم يحبّو الموسيقى
و يشترو أغاني للصبح
بس مين توصل معاه لدرجة الغرق؟!
أو أقلّو عيونو تدمع
من الكلام
و معانيه
ولاّ التلسيع إللي شغال
مين؟

من جد مين؟