أزارير جديدة

 

 

 

 

 

حطوها في مدوناتكم
قولو للناس عليها
قد ما تضغطو عليها قد ما حبي ليكم يزيد
ولاّ كيف؟!!
و إن شاء الله تكون عاجبتكم
سلام

 

 

أضغطو على الصورة عشان تشوفو الباقي

ولاّ روحو على صفحة Unique-M

 

يوم في حياة أوسكار

 

 

 

نشر هذا المقال باللغة الانجليزية في المجلة الطبية المرموقة

 

The New England Journal of Medicine

 

و هو مختلف عن معظم ما ينشر فيها من أخبار و دراسات طبية علمية بحتة

 

يحكي المقال عن يوم عادي في حياة القط أوسكار و الذي يعيش في مصحة للمسنين تدعى

 

Steere House Nursing and Rehabilitation Center in Providence, Rhode Island

 

بينما يتمشى أوسكار في ممرات الدور الثالث في المصحة يقف أمام باب إحدى الغرف. يقف بصبر منتظرا أمام باب الغرفة . بعد 25 دقيقة تفتح إحدى الممرضات باب الغرفة في طريقها للخارج. ترى أوسكار منتظرا عند الباب فتفسح له الطريق ليدخل. بداخل الغرفة يوجد شخصان، أحدهما السيدة : ت، النائمة على الفراش، و هناك ابنتها تقرأ بجوارها. تحيي الابنة أوسكار عندما تراه. يقفز أوسكار على سرير السيدة التي أنهكها السرطان و التي تبدو في مرحلة حياتها الأخيرة. يتفحصها سريعا… إنها تتنفس بصعوبة. يشم أوسكار الهواء…ثم يقفز إلى الأرض مسارعا بالخروج من الغرفة. ليس اليوم.

 

ينتقل أوسكار إلى غرفة أخرى. الباب مفتوح، وبالداخل تنام السيدة ك وحيدة، إلا من صور عائلية تملأ غرفتها. يتشمم أوسكار الهواء ثانية. يتأمل السيدة التي تتنفس بصعوبة مثل جارتها. يقرر أوسكار فجأة أن يتكور على نفسه بجوار السيدة في سريرها.

 

بعد ساعة تقريبا تدخل ممرضة. تلاحظ وجود أوسكار بجوار السيدة النائمة فتسارع بالخروج من الغرفة لتراجع ملف السيدة ك. تقلب بعض الأوراق، ثم تسارع بإجراء بعض الاتصالات الهاتفية.

 

خلال نصف ساعة كان أفراد العائلة قد اجتمعوا. سيدات و رجال و أطفال حضروا لتوديع جدتهم العجوز. في الغرفة أيضا يوجد القس يتلو دعوات لروح السيدة المريضة التي ما لبثت أن أسلمت الروح. عندئذ فقط، يخرج أوسكار من الغرفة.

 

بينما يتمشى أوسكار في الممرات ثانية، يتأمل اللوحة المعلقة على الجدار، والتي تحمل شهادة التقدير الموجهة للقط الذي لا يتوفى أحد في الدور الثالث من المصحة بدون أن يمر بغرفته و يبقى فيها.

 

ملحوظة: منذ تم تبني أوسكار صغيرا في المصحة ساعد الكثيرين من المرضى و الذين كانوا في مراحل حياتهم الأخيرة. لوحظ أن وجوده و بقاءه في غرفة أي مريض هو علامة لم تخطأ أبدا في أن ذلك الشخص سيموت قريبا جدا. اعتبر الأطباء و الممرضات ذلك إشارة ليبلغوا العائلة بتدهور حالة مرضهم. من دون خدمات أوسكار ، كان الكثيرون في المصحة سيسلمون الروح وحيدين.

 

——————————————————–

 

القصة مترجمة بتصرف شديد من جانبي

 

سبحان من جعل على أبصار بعض بني البشر غشاوة…فلا يرونه سبحانه

 

- – - -

 

 

 

 

[ الموضوع منقول من مدونة

The Blood Doctor

الطبية]

 

 

لفت إنتباهي و عجبني فقلت أزيد طرحو على مدونتي

و الشكر راجع لأختنا المحترمة دكتورة الدم

و السلام عليكم

محد لقي حل للدخان؟

 

التدخين
أحد لقيلو حل؟
في أحد بيفكر يقوم على العالم و يفكرهم و يوعيهم إنو الدخان غلط و مضر؟
إلين متى؟؟
أنا ترا بس بأذكر
و يا رب ما يحتاج نذكر مرة تانية
لأنو الكلام عن الدخان ساير موضة دي اليومين

بصراحة مين عندو مشكلة دخان
نفسي أتفاهم مع واحد أو وحدة ( يدخن أو تدخن ) على مدونتي
يمكن نحل المشكلة و يوقف أو توقف!!

بإذن الله

أنا مستني!

و الله يهدي عبادو

أهم حاجة الفم

بالله!
إيش رأيكم في الناس إللي لمن يكونو في حوار
و المحاضر ( أو قائد الحوار ) يوضح و يحدد نقاط معينة بإنها مهي في الحوار و ممنوع التكلم عنها أو الإستنباط منّها بأي شكل من الأشكال (( من قبل ما الحوار بدأ أصلاً ))
و في النهاية برضو البني آدم أخينا دا يرجع و يفتح الموضوع و يتكلم عنّو كأنّو جي الحوار يتكلم عنو بشكل أساسي!
هاديك الساعة ما نفسك تسوي ولا حاجة!! غير إنك تقوم و تصفقو كف على وجهو ( أو وجهها ) إلين ما يطير الفم من وجهو ( أو.. زي ما قلت ) و يطيح تحت الطاولة
و إزا تبغو كمان أزيد…. إلين ما يندعس على الفم إتنين و تمانين مرة

بس النرفزة مو من طباعنا كمسلمين و لازم نمسك نفسنا قد ما نقدر عشان نكسب الأجر و نتدارك أنفسنا و نعرف كيف نتعامل مع الناس دول بأسلوب راقي إلين ينعدلو
و إن ما أنعدلو؟! الله معاهــــــم!

فسؤالي, إيش رأيكم؟

إنتقادات و بس

 

بسم الله الرحمن الرحيم نبدأ

 

يا جماعة

بالعربي, إللي مو عاجبو كلامي أو أسلوب كلامي

يفهمني

يقلي ليش

الله يرضى عليكم صححوني و صلحوني

بتجيني رسايل سب و حش على إيميلي من غير سبب, ( مافي سبب يوضح الخطأ )

واللي أعترضو على صورتي, إيش المشكلة؟

الإبتسامة غلط
عريضة زيادة عن اللزوم؟

غلط أضحك؟

مكانها مو مناسب؟

اللوقو إللي فيه كلمة أنمار

اللون الأحمر محرم؟

جاذب للجنس؟

ليش الإعتراض عشان أقتنع بتغييرو

الثيم مزعجكم؟

شخصيًّا مقتنع بيه لأنو مافيه أشياء زايدة على اليمين و اليسار

إزا مو عاجبكم أدوني سبب تغييرو

أما عن الكلام

بأسب أحد؟

مو مفهوم

أنا معترف بكتير من اللخبطة في اللهجة و الكلمات الغريبة

و بأحاول أتجنب الكلام دا كلو

في كم واحد و وحدة قالولي إنو كلامي في شوفة نفس

و أحيانًا تكبر

يعني الوضع مو عاجبهم شوية

أنا هدفي حاجتين ( فتح باب الفكاهة في المدونة و الثقة القوية في النفس )

ليس إلاّ

إللي معترض يقلي السبب عشان أقتنع معد أقول كلام زي دا!

بس محتوى المواضيع, مو مناسب؟

بأتعدّى حدودي و على أعراض أي أحد؟

طلب خاااااااااااااااااااااااااااااااااااااااااااااااااااااااااص

كلمة وحد بس

(( صححوني ))

الله يجزيكم خير

اقرأ

 

موضوع جاني فجأة و أنا بأقرى آخر الأخبار اليوم

 

لاحظت نفسي بأقرا عدد كبير من الأخبار في كتير مجالات و مواقع أخبار كتيرة

العدد هائل

هادا و أنا مرتب نفسي بالآر إس إس

RSS

و جاني في بالي سؤال

معقول يكون قراءة كم هائل من المعلومات ( المتنوعة ) شي طبيعي؟

يعني علشان البني آدم يسير مثقف و ملم بأمور الحاضر و المستقبل يحتاج يدخل الدوامة و العاصفة العويصة دي كل يوم؟

و خاصًّة على الإنترنت

 

موضوع ورا موضوع

و كل واحد لوه سطور و سطور

و ردود ورا ردود

هادا موقع واحد بس

بصراحة أكتر الناس ( و أنا منهم ) ما يقرو إلا العناوين و يستقرو على المواضيع إللي تهمهم و يقروها

أشوف هوّا دا عين العقل

عشان المخ لا يضرب علينا من كتر المعلومات المشعترة

 

سبحان الله إللي خلق القراية و علمنا عليها

 

رسالة للـ ( مطاوعة )

 

بسم الله الرحمن الرحيم

 

عندي موضوع ينقز عليا كل شوية, و أروح و أرجع عليه في مخي بين كل فترة و فترة

 

الوظيفة إللي ربنا طالبها مننا في حياتنا

 

و النقطة الأهم

 

متى نبدأ نشتغل على دي الوظيفة

 

يعني الوقت الصحيح

 

نبدأ

 

إحنا المطلوب مننا إننا:

 

- نعيش حياتنا

 

- نتعلم عشان نكوّن نفسنا

 

- نكتشف إيش الوظيفة

 

- نخطط متى نبدأ الوظيفة و نبدأ (( نخطط أول ))

 

- ننفلت ( We Spring ) و نبدع

 

( ملاحظة: مو قصدي Sprint )

 

* كل النقاط تحت محيط الدين ( و بالنسبة ليّا ” دين الإسلام ” )
غير كدا, هدفنا في حياتنا الأساسي طبعًا هو رضى الله علينا سبحانه و تعالى و دخول فسيح جناته

 

–

 

نمسك النقاط دي حبة حبة

 

-
^ نعيش حياتنا

 

أول شي لازم ننولد
ننبسط في طفولتنا
نكبر شوية نفلها و نتمشى و نعيش الدنيا بكل إستمتاع و حماس

 

(( الإنفتاح التام دا بس لعمر معين ))
بعد كدا لازم نروق شوية ( بس شوية عشان لا يروح الحماس )

 

-
^ نتعلم عشان نكون نفسنا

 

نروح المدرسة نتعلم ( في الجامعة نفس الشي )
دين
علوم دنيوية
تاريخ
لغات

 

في البيت نتعلم
أهالينا يعلمونا كيف نعيش كعيلة ( كأسرة )
الحب أو المحبة
القيم و الأصول
الأدب و الإحترام
نتعلم كيف نربي لمن نكبر و يسير عندنا أولاد و بنات

 

[ النقطتين إللي فاتو دول يساعدوك تعرف وظيفتك ]

 

-
^ نكتشف إيش الوظيفة

 

إيش تبغا تسوي في حياتك؟
ليش هادي الوظيفة بالذات؟
إيش فايدتها؟
و الأهم, ليش ربنا أختارك إنتا بالذات لهادي الوظيفة و على أيّت أساس إنتا الشخص المثالي لهادي الوظيفة؟
( أسئلة الإكتشاف حقك )

 

-
^ نخطط متى نبدأ الوظيفة

 

الشخص لازم يخصص وقت في اليوم يشتغل على الإستزادة في التعلم عن وظيفتو
يتعلم كيف يشتغل و يتوسع في التعلم من كل النواحي
يجرب
يكسب خبرة
يغلط ( مو مشكلة ) لأنه لسّا ما بدأ يشتغل!
و كل ما يغلط يوضح إنو تحت التدريب و التعليم
يقيم نفسو عند الناس إللي بدأو نفس وظيفتو من قبلو ( أهل الخبرة ) بإستمرار

 

إلين ما يجيلو الأوكي ( الرخصة أو النور الأخضر )
بعدين يبدأ

 

طيب الناس إللي بيسألو عن إيش علاقة الموضوع بالمطاوعة, إيش أجاوبهم؟

 

جوابي [ كم بني آدم بيفتي و يتكلم و يسوي فيها شيخ على كيفو و هوّا ماهو داري عن الدين (( ما يكفي )) ؟ ]

 

يكون ما عندو شي يسوّيه
يا فاضي
يا طفشان
أهم شي عندو إنّو يسوي حاجة تفكلّو الطفش
و خاصةً إللي مسوي داعية

 

أهم شي في إنك ( تشتغل ) كداعية هو إنك تتعلم (( الدعوة ))
لأنو الدعوة ليها أساليب و آداب تحتاجها عشان تنتبه من إنك تنفر إللي قاعد تدعوه

 

قبل ما أسوق, أتعلمت السواقة
قبل ما أتسبحت, أتعلمت السباحة
قبل ما أستخدمت الكمبيوتر, أتعلمت كيف أستخدمو

 

الشي إللي ينكد عليّا كمان إنو في ناس كتييييييييييييييييييييييييييير يحسبو إنو ربهم خلقهم بس عشان يسيرو دعاه
الدنيا و البلد و العالم محتاج وظايف و شغلات تانية
و تكون إنتا مفروض تشتغل شغلة معينة بس بالصدفة كدا إنتا شغال تفتي يمين و يسار و تنفر الناس من الدين و تكرههم فيه

 

نبغا:

 

محاضرين
خطباء
مدربين سباحة
مخرجين
منتجين
رسامين
مغنيين
فنانين
مصممين
مخططين
مفكرين
ممثلين
مجهزين حفلات و مناسبات
خطاب
خياطين
ممسجين
جسّيسين
كتّاب
رواة قصص
مقرئين قرآن كريم
مدرسين و معلمين ( المدرسين و المعلمين ضروري يستزيدو في علم التربية و التعليم لأنهم أساس النقطة إللي تجي قبل إكتشاف الوظيفة )
العالم مليان وظايف غير الدعوة
وظائف حتسد و تقفل أبواب كتيرة للعطالة

 

أنا ما أقصد ( لا تتكلم عن الدين )

 

بكل بساطة قصدي إنك ممكن تتكلم عن إللي تعرفو عن الدين ( بجانب وظيفتك ) و توضح إنك منتا جاهز لإنك تكون داعية و مو شرط كلامك صحيح

 

أصلاً إحنا مكتفين بالدعاه الكفؤ من زمان و ما شاء الله عليهم ما يقصرو في أي وقت تحتاج تستشيرهم في أي موضوع في حياتك حيساعدوك
و هما كدا ولا كدا شغالين يحاضرو في أماكن كتيرة
و المساجد مفتوحة
من أكتر الأشياء إللي وحشتني و أنا في أمريكا المساجد و الحرم بالذات.

 

هادي أهم نقطة و هيّا النقطة إللي جابت الموضوع
نخطط الوقت المناسب و السليم لإننا نبدأ نشتغل في دي الوظيفة ( إللي أكتشفناها )
و الموضوع زي ما قلت ما يقتصر على الدعوة
الموضوع منفتح لكل الوظايف الموجودة ( للأسف الرهيب كتير منها مهي موجودة لأنو محد معترفبها ) و لازم نحييها

 

-
^ النقطة الأخيرة هي نقطة الإنفلات و الإبداع

 

خلاص أنقبلنا و أتدربنا لدرجة الكفائة
بعد ما بدأنا نشتغل
نبدأ نبدع و نتشعب و نزيد من علمنا
نكبر في مجالنا و نحاول نوصل لأعلى درجاتو
ندور على أحسن واحد ( شخص أو شركة أو مجموعة أو أيًّا كان ) في مجالنا
نتعلم منو
نتحداه
و نهدف لإننا نوصل لدرجات أعلى منو
سواءًا وصلنا ولاّ ما وصلنا
برضنا في وضع التعلم

 

في رأيي التعلم ما عمرو يوقف
إلين ما نموت و إحنا نتعلم من خطأنا و من صوابنا
من فشلنا و من نجاحنا
حتى من موتنا نتعلم!

 

–

 

موضوع قديم كنت أتضارب مع أخويا أبي عليه

 

تسمية المطاوعة بـ ( المطاوعة )
الإسم متعارف عليه من سنين
أساس الكلمة هو الـ ( متطوع ) أو الـ ( متطوعين )
القصد هو المتدينين المتشددين

 

ما أحب أستخدم دا المصطلح

 

و أفضل ( الملتزمين أو المحسنين ) للي ماشي في السليم
ملتزمين لأنهم ملتزمين بدينهم أو متمسكين بيه أكتر من غيرهم
محسنين لأنهم بين المسلمين و المؤمنين ( أفتكر درسناها في المتوسطة أو بداية الثنوية )

 

و إللي ماشيين غلط ما عرفت إيش أسمّيهم لأنهم ماشيين غلط فأستقريت على ( ماشيين غلط )
(( و يحتاجو تصليح ))

 

–

 

باب الأسئلة و التعليقات مفتوح
و إزا عندكم إنتقادات, حأزعل منّكم إزا ما أنتقدتوني
لأني ماني دايمًا صح
ولاني دايمًا متفق معاكم أو مع كتير ناس
فالنقاش يفيد كتييييييييييير

 

بس طبعًا أنا دايمًا قوي

 

السلام عليكم و رحمة الله و بركاتو

الصدقة الغالية المغلفة بورق هدايا

بسم الله الرحمن الرحيم

 

موضوع فكرني بيه بندر رفة الله يجزيه بالخير
ألا و هو الصدقة

 

زي ما قلت في مدونتو إنو الصدقة قد ما تقل أو تزيد أو إيش ما كانت,, تفرح
تفرح في القلب
البزورة الصغار يفرحوبها
و الكبار يحمدو ربهم عليها و يدعو للي أدّاها
و الأجر في النهاية راجع للي يأديها

 

إللي أبغا أزيدو على الهرجة دي هو ( الكفاء و الوفاء )

 

بالعربي
لمن يكون عندك إمكانية تدي ألف ريال لشخص ما عمرو شاف المية
لا تبخل و لا تتردد تديلو هيا

 

أفتكر الشيخ على أبو الحسن الله يوفقو قال في محاضرة من محاضراتو مرة, الأسلوب إللي نستخدمو في الصدقة

 

لمن نروح محطة بنزين ( بنزيم, بانزيم, بانزين, وقود ولاّ أي حاجة ) و ندي الهندي, الباكستاني ولاّ المصري ولاّ مين ما كان الفلوس و ناخد الباقي و نمشي
ليش ما نسيب الباقي؟
ليش ما نديه شوية من الباقي؟

 

الشيخ أدانا مثال مرة حلو

 

لمن تتصدق بأكل ولا سجادة ولاّ كرسي ولاّ أي حاجة ملموسة
بدل ما تديلو القديم عشان تشتري جديد
أخرج خرجة خاصة ولاّ مشوار خاص بصدقة الفقير أو المسكين
و أشتري حاجات جديدة و غلفها في ورق هدايا و حط ورد فوقها و وصلها للفقرا و المساكين

 

المسكين مو إسمو مسكين عشان ياخد أقدم شي و أعفن شي طول حياتو
المسكين مسكين عشان ما يقدر يوفر يشتري الجديد

 

و المفروض علينا إحنا العفيفين نساعدهم و نفرحهم بأي شي جديد ممكن إحنا نتمناه

 

قبل ما أنصح غيري, أنا أنصح نفسي و بإذن الله ما أبخل على أي فقير أو مسكين في حياتي من اليوم
مو شرط كل الناس يعرفو
كل مين بينو و بين ربو و نفسو

 

أطلب من كل واحد تتصدق عليه إنو يدعيلك و بإذن الله تنقبل و تكسب ثواب ما يتقدر بتمن

 

الله يوفقنا كلنا على الخير و التزبيط في بلدنا العزيزة

 

السلام عليكم

عايش في خير و نعمة الحمد لله

 

سامحوني يا أصحابي على الإنقطاع عن المدونة بس كنت الشهر (إلى الشهرين) إللي فاتو في دوامة تعبتني شوية (ما أنتهت بس خلصت جزء كبير منها و الحمد لله) و إن شاء الله تنهي على خير, أدعولي من قلوبكم بالله
الله يسعدكم!
إن شاء الله أجهز موضوع حلو فلة كدا يعجبكم

سلام

القرآن الكريم

 

المصحف

 

 

القرآن الكريم

 

إيش رأيكم فيه؟

 

صورت الصورة و غيرت ألوانها

 

خلّيتها رايقة و هادية

 

مين مهي عاجبتو

 

حأتضارب معاه

 

يلاّ

 

سلامز

 

-

 

هيا يا ستي أتفضلي الفاتحة

المصحف